Investitsiyalar va tashqi savdo vazirining birinchi o‘rinbosari, O‘zbekiston Respublikasi Strategik rivojlanish agentligi Bosh direktori Laziz Qudratov Iqtisodiy hamkorlik va taraqqiyot tashkilotining Yevroosiyo mamlakatlari bilan ishlash bo‘limi rahbari Uilyam Tompson bilan uchrashdi.
O‘zbekiston bugungi kunda IHTT bilan korrupsiyaga qarshi kurashish, IHTT mamlakatlari bilan savdo-iqtisodiy hamkorlikni kengaytirish, raqobatbardoshlikni oshirish va investitsiyalarni jalb qilish, transport aloqasi, yashil iqtisodiyot, IHTT tasnifiga muvofiq respublikaning kredit reytingini yaxshilash bo‘yicha mamlakatning manfaatlariga javob beradigan bir qator sohalarda faol hamkorlik qilmoqda.
Uchrashuvda Agentlik rahbari Laziz Qudratov taʼkidlaganidek, “O‘zbekiston Korrupsiyaga qarshi kurashdagi hamkorlikni 2010 yilning mart oyida qo‘shilgan Istanbul harakat rejasi doirasida amalga oshiradi. O‘zbekiston delegatsiyalari IHTT tomonidan tashkil etiladigan tegishli tadbirlarda muntazam ishtirok etib kelmoqda. Sharqiy Yevropa va Markaziy Osiyo uchun korrupsiyaga qarshi tarmoq ishida qatnashadi. IHTT mamlakatlari bilan savdo-iqtisodiy hamkorlikni kengaytirish maqsadida O‘zbekiston Respublikasi delegatsiyalari har yili o‘tkaziladigan “Yevroosiyo haftaligi” xalqaro forumida ishtirok etib, unda IHTTga aʼzo davlatlar kompaniyalari bilan seminarlar, taqdimotlar, biznes-forumlar va muzokaralar tashkil etadi. Tadbirlar davomida xorijiy kompaniyalarga O‘zbekiston Respublikasining iqtisodiy va sarmoyaviy salohiyati, mamlakatda yaratilgan qulay sarmoyaviy va ishbilarmonlik muhiti, shuningdek, O‘zbekiston mahsulotlarini eksport qilish va O‘zbekiston Respublikasida qo‘shma yuqori texnologik tarmoqlarni amalga oshirishda istiqbolli hamkorlik loyihalari haqida batafsil maʼlumot berib boradi.”
Uchrashuv davomida tomonlar barcha qo‘shma loyihalarni amalga oshirish va ko‘p qirrali hamkorlikni kengaytirish istiqbollarini muhokama qildilar. Xususan, IHTT “O‘zbekistonda xususiy sektorning raqobatbardoshligini oshirish uchun raqamli savodxonlikni rivojlantirish” va “Markaziy Osiyoda savdo aloqalarini yaxshilash va tadbirkorlikning huquqiy muhitini monitoring qilish” loyihasi bo‘yicha ish natijalarini taqdim etdi.
– Biznes uchun huquqiy muhit loyihasi doirasida O‘zbekiston 2019 yildan buyon iqtisodiyotning 22 ta sohasiga to‘g‘ridan-to‘g‘ri xorijiy investitsiyalar bo‘yicha cheklovlarni nazorat qiluvchi va tartibga soluvchi IHTT to‘g‘ridan-to‘g‘ri investitsiyalar normativ cheklov indeksiga kiritilgan. O‘zbekiston hozirgi kunda IHTT mamlakatlari bo‘yicha o‘rtacha darajada bo‘lib, Markaziy Osiyoning boshqa davlatlaridan oldinda bormoqda.
IHTT mamlakatning takomillashuvini doimiy ravishda kuzatib boradi va tashkilotning tadbirlarida O‘zbekistonning Markaziy Osiyoning boshqa davlatlari va IHTTga aʼzo mamlakatlar uchun muntazam hisobotlarini boshlaydi, – deydi Yevroosiyo mamlakatlari bilan ishlash bo‘yicha IHTT bo‘limi rahbari Uilyam Tompson.
Shu bilan birga, uchrashuvda O‘zbekistonning Tblisi (Gruziya)da Yevroosiyo haftaligi-2022 da ishtirok etishga tayyorgarlik ko‘rish masalasi muhokama qilindi, unda O‘zbekiston Respublikasi hukumati va Iqtisodiy hamkorlik va taraqqiyot tashkiloti o‘rtasida o‘zaro kelishuv memorandumi imzolanishi rejalashtirilgan. Ushbu Memorandum davlat boshqaruvi va korrupsiyaga qarshi kurash, bandlik va ijtimoiy integratsiya, investitsiyalar, ishbilarmonlik muhiti va iqtisodiy siyosatning boshqa sohalarida hamkorlik qilishga qaratilgan.
Uchrashuv yakunida tomonlar ikki tomonlama hamkorlikni kengaytirish va respublikada ijtimoiy-iqtisodiy rivojlanish va biznes sharoitlarini yaxshilashga qaratilgan yangi qo‘shma loyihalarni amalga oshirish bo‘yicha kelishuvlarga erishdilar.
Strategik rivojlanish agentligi Matbuot xizmati
