Bugun Toshkentda ma’lumotlar asosida qaror qabul qilish madaniyatini shakllantirish hamda davlat boshqaruvining barcha darajalarida monitoring va baholash tizimini isloh etish zarurligiga bag‘ishlangan seminar bo‘lib o‘tdi. Tadbir Strategik islohotlar agentligi, Latviya Respublikasining O‘zbekistonda davlat boshqaruvi salohiyatini qo‘llab-quvvatlash loyihasi va Germaniya xalqaro hamkorlik jamiyati (GIZ) hamkorligida tashkil etilib, unda 50 dan ortiq vazirlik va idoralar vakillari ishtirok etdi.
Tadbir davomida asosiy mavzu davlat dasturlari va investitsiyalarining shaffofligi, samaradorligi va natijadorligini oshirishga xizmat qiluvchi monitoring va baholash tizimini ishlab chiqish masalalariga bag‘ishlandi. Ishtirokchilar ishonchli ma’lumotlarga asoslangan boshqaruv modeliga o‘tish, strategik rejalashtirish sifatini oshirish va hukumat qarorlari ijrosini ta’minlashning asosiy yo‘nalishi ekanini alohida ta’kidladilar.
Xorijiy ekspertlar Latviya Respublikasining monitoring va baholash tizimi bo‘yicha ilg‘or tajribasini taqdim etdilar. Ishtirokchilarga jarayonda qo‘llanilgan amaliy vositalar ko‘rsatildi, turli bosqichlarida davlat organlari duch keladigan muammolar muhokama qilindi.
Strategik islohotlar agentligi tashabbusi bilan O‘zbekistonda ishlab chiqilayotgan Davlat sarmoyalarini boshqarish geoportaliga alohida e’tibor qaratildi. Ushbu raqamli vositadan investitsiya loyihalarining monitoringi va ularning samaradorligini baholash uchun foydalanilishi ko‘zda tutuilgan. Geoportal real vaqt rejimida amalga oshirilayotgan ishlarni kuzatish, yutuqlarni tahlil qilish va boshqaruvda ma’lumotlarga asoslangan qarorlarini qabul qilish imkonini beradi.
Muhokama davomida davlat organlari, xalqaro tashkilotlar vakillari va ekspertlar tomonidan ma’lumotlarga asoslangan boshqaruv madaniyatini rivojlantirishning ahamiyati, yagona monitoring va baholash tizimini yaratish zarurati, boshqaruvning turli darajalarida monitoring va baholash tizimini joriy etishning afzalliklari va qiyinchiliklari, strategiyalarni ishlab chiqish va amalga oshirishda ma’lumotlar sifati va yaxlitligi roli muhokama qildilar.
