2025-yil 15–16-aprel kunlari “Strategik rejalashtirish: VII modul. Monitoring, hisobotlilik va baholash” mavzusida ikki kunlik seminar bo‘lib o‘tdi. Tadbir strategiyalarni amalga oshirish, monitoring qilish va baholash masalalariga bag‘ishlandi. Seminar Strategik islohotlar agentligi tomonidan Latviya Respublikasining Markaziy moliyalashtirish va kontraktlar agentligi (CFCA) hamda Germaniya xalqaro hamkorlik jamiyati (GIZ) ko‘magida tashkil etildi. Unda milliy strategik rejalashtirish tizimini rivojlantirishda ishtirok etayotgan 30 dan ortiq vazirlik va idora vakillari qatnashdi.
Tadbir davomida strategiyalarni amalga oshirishdagi asosiy jihatlar, jumladan, tatbiq etish bosqichida yuzaga keladigan odatiy muammolar va ularni bartaraf etish yo‘llari ko‘rib chiqildi. Monitoring qilish va baholash muhim boshqaruv qarorlarini o‘z vaqtida va asosli qabul qilish imkonini beruvchi vositalar sifatida alohida e’tirof etildi. Shuningdek, davlat dasturlarining ijrosida shaffoflik va hisobdorlikni ta’minlovchi samarali hisobot tizimini shakllantirish zarurligi ta’kidlandi.
Ishtirokchilar ma’lumotlarni yig‘ish, qayta ishlash va tahlil qilish uslublarini, hamda ularni boshqaruv maqsadlarida talqin etish yondashuvlarini o‘rgandilar. Amaliy mashg‘ulotlar davomida birlamchi va ikkilamchi manbalar tahlil qilinib, ularni tuzish va ishonchliligini baholash mexanizmlari ko‘rsatib berildi. Monitoringning mantiqiy asoslarini ishlab chiqish, ma’lumotlarni yig‘ish vositalari va tahliliy hisobotlar tayyorlash bo‘yicha amaliy misollar keltirildi.
Dastur doirasida strategiyalar samaradorligi va ta’sirini baholash masalalari ham muhokama qilindi. Monitoring qilish va baholash tizimining tuzilishi — rejalashtirish, indikatorlarni shakllantirish, ma’lumotlarni qayta ishlash va tavsiyalar tayyorlash bosqichlarini qamrab olgan holda ko‘rib chiqildi. Ishtirokchilar institutsional muvofiqlashtirish, manfaatdor tomonlarni jalb etish va ma’lumotlarga asoslangan boshqaruv madaniyatini rivojlantirish zarurligini alohida ta’kidladilar.
