Bugun Strategik islohotlar agentligida agentlik direktori Baxodir Raxmatovning O‘zbekiston Respublikasi Prezidentining iqtisodiy rivojlanish, samarali boshqaruv hamda xalqaro hamkorlik masalalari bo‘yicha maslahatchisi Suma Chakrabarti bilan uchrashuvi bo‘lib o‘tdi. Tadbirda shuningdek S. Chakrabarti Ofisi vakillari Mandip Beyns, Mari-Enn Birken, Jonatan Charlz va Friderike Zayfert ishtirok etishdi.
Uchrashuvda tomonlar O‘zbekistonning xalqaro reytinglardagi o‘rnini yaxshilashga qaratilgan Prezident Farmoni loyihasini muhokama qildilar. Mamlakat raqobatbardoshligini mustahkamlash va barqaror o‘sishni ta’minlashga xizmat qiluvchi ilg‘or xalqaro tajribalarni integratsiya qilish bo‘yicha takliflar taqdim etildi.
Shuningdek uchrashuv ishtirokchilari 2025-yilga mo‘ljallangan investitsiya kampaniyasini tayyorlashga doir Prezident farmoyishi loyihasini muhokama qildilar. Investitsiyalarni jalb qilishga qaratilgan xalqaro tadbirlarni tashkil etish va xalqaro moliyaviy institutlar bilan aloqalarni mustahkamlash bo‘yicha choralar taklif qilindi.
Huquqiy va institutsional islohotlarni muhokama qilish masalasi Xalqaro tijorat sudini tashkil etish kontekstida davom etdi. Ekspert Mari-Enn Birken tijorat nizolarini hal qilishda shaffoflik va samaradorlikni ta’minlash uchun xalqaro standartlarni qo‘llash zarurligiga e’tibor qaratdi, bu esa xorijiy hamkorlar ishonchini mustahkamlashga xizmat qiladi.
Uchrashuvda davlat xizmatini transformatsiya qilish uchun Akademiya davlat boshqaruvi, «El-Yurt Umidi» jamg‘armasi va Davlat xizmatini rivojlantirish agentligini birlashtiruvchi klasterni yaratish masalasiga alohida e’tibor qaratildi. Bunday yondashuv yuqori malakali kadrlarni tayyorlashni yanada samarali amalga oshirish va davlat boshqaruvi islohotlarini zamonaviy ehtiyojlarga mos ravishda amalga oshirish imkonini beradi.
Uchrashuvda yana bir muhim mavzu 2025-yil uchun yangi «yo‘l xaritasi»ning asosiy yo‘nalishlari bo‘ldi. Ushbu muhokama mantiqan 2024-yil uchun mo‘ljallangan «yo‘l xaritasi» doirasida belgilangan vazifalarning bajarilishi natijalarini tahlili bilan boyitildi.
