Strategik islohotlar agentligida Elektron to‘lovlar ulushini oshirish bo‘yicha kompleks chora-tadbirlar rejasini tayyorlash doirasida moliyaviy sektor vakillari bilan uchrashuvlar tashkil etilmoqda. Navbatdagi uchrashuv yetakchi to‘lov tashkilotlari — Click asoschisi va bosh direktori Ulug‘bek Rustamov, OSON yuridik direktori Dilshod Keldiyarov va PAYNET bosh direktori Anvar Isamuhamedov ishtirokida bo‘lib o‘tdi.
Tadbir davomida elektron to‘lovlarning boshqa hisob-kitob shakllariga nisbatan raqobatbardoshligiga ta’sir qiluvchi omillar, shuningdek elektron to‘lovlarni qabul qilish majburiy bo‘lishi lozim bo‘lgan sohalar ro‘yxatini kengaytirish zarurligi muhokama qilindi.
To‘lov tashkilotlari vakillari parkovkalar, avtoturargohlar va bozorlarda patent to‘lovlarini yig‘ish kabi ayrim sohalarda hanuzgacha naqd to‘lovlar ustunligini qayd etdi. Ushbu sohalarni elektron to‘lovlarni qabul qilish majburiy bo‘lgan yo‘nalishlar ro‘yxatiga kiritish taklifi ilgari surildi.
Shuningdek, temiryo‘l chiptalari savdosi, kommunal xizmatlar to‘lovi va marketpleyslar orqali xaridlar bo‘yicha 100% naqdsiz hisob-kitob tizimiga o‘tish tashabbusi muhokama qilindi. Ishtirokchilar bu kabi qadamlar hisob-kitob jarayonlarini soddalashtirish bilan birga, naqd pulning yashirin aylanmasini kamaytirishga xizmat qilishini ta’kidladilar.
Strategik islohotlar agentligi tomonidan biznes, IT-sohasi vakillari va ekspertlar bilan muloqot davom ettirilib, barcha taklif va tashabbuslar har tomonlama tahlil qilinadi hamda elektron to‘lovlar ulushini oshirish, zamonaviy va qulay to‘lov infratuzilmasini yaratish maqsadida ishlab chiqilayotgan Prezident qarori loyihasini tayyorlash jarayonida inobatga olinadi.
