2024-yil 9-fevral kuni Strategik islohotlar agentligida VEON AdTech kompaniyasining yetakchi vakillari bilan uchrashuv bo‘lib o‘tib, unda asosiy e’tibor internet foydalanuvchilari xatti-harakatlarini tahlil qilishga qaratildi. Uchrashuvda agentlik direktorining birinchi o‘rinbosari A.Abduqodirov, VEON AdTech kompaniyasi direktori Jorj Xeld, Agentlik xodimi B.Qurbonov va VEON Ad kompaniyasi vakillari Nikolay Andryuxin, Bekzod Suvanqulov va Vladislav Yakovlev ishtirok etdi.
Uchrashuvda Veon AdTech direktori kompaniya xizmatlari haqida umumiy ma’lumot berib, raqamli reklama va ma’lumotlar tahlili sektorini samarali faoliyat yuritishdagi ahamiyatini alohida ta’kidladi. Nikolay Andryuxin va Bekzod Suvanqulov O‘zbekiston va boshqa mamlakatlarda Big Data va AdTech yechimlaridan muvaffaqiyatli foydalanilgan misollar taqdimotini o`tkazdi.
Muhokamalar davomida Agentlik va Veon o‘rtasidagi hamkorlikning asosiy yo‘nalishlari belgilab olinib, internet foydalanuvchilarining xatti-harakatlarini tahlil qilish uchun mobil operatorlar tomonidan yaratilgan yirik ma’lumotlar to‘plamlaridan foydalanish imkoniyatlari muhokama qilindi. Ushbu ma’lumotlar shahar aholisining kunlik migratsiyasi sabablari, odamlar va avtomashinalarning bir joyga to`planish xususiyatlari to’g’risida aniq tasavvur beradi, shuningdek, tadbirkorlarning xufiyona biznesga o`tish sabablarini, daromadlarni yashirish motivlarini tahlil qilish kabi boshqa muhim jihatlar ega hisoblanadi.
Uchrashuvda axborot xavfsizligi va tadqiqotning yakuniy maqsadlarini tushunish masalalari ham muhokama qilindi. Har ikki tomon ham hamkorlikni chuqurlashtirish va ma’lumotlarni tahlil qilish va raqamli reklama uchun yangi vositalarni ishlab chiqishdan manfaatdor ekanligini tasdiqladi.
