Strategik islohotlar agentligida Agentlik direktori Baxodir Raxmatovning Toni Bler Global o‘zgarishlar instituti Osiyo-Tinch okeani mintaqasi bo‘yicha boshqaruvchi direktori Jalil Rashid va maslahat guruhi menejeri Zisin Lin bilan uchrashuvi bo‘lib o‘tdi.
Uchrashuv boshida Institut vakillari o‘z faoliyati va tashkilotning asosiy afzalliklari haqida batafsil ma’lumot berishdi. Ular orasida yuqori malakali sobiq davlat xizmatchilarining loyihalarda ishtiroki, xavf va imkoniyatlarni tahlil qilish bo‘yicha yetuk tajriba hamda 50 dan ortiq mamlakatda maslahat xizmatlarini ko‘rsatish bo‘yicha tajriba borligi ta’kidlandi. Shuningdek, institut strategik hamkorlar va iqtisodiyotning asosiy tarmoqlarini rivojlantirishga ko‘mak beruvchi tashkilotlarni jalb qilish borasida keng imkoniyatlarga ega.
Zisin Linning so‘zlariga ko‘ra, hozirgi vaqtda Toni Bler Global o‘zgarishlar instituti dunyo bo‘ylab 135 dan ortiq faol loyihalarni amalga oshirmoqda. Ularning qatorida Ozarbayjon, Albaniya, Indoneziya va Hindiston bilan hamkorlik loyihalari ham mavjud.
Yangi hamkorlik yo‘nalishlarini rivojlantirish maqsadida O‘zbekistonning tegishli vazirlik va idoralari bilan onlayn uchrashuvlar tashkil etish taklif qilindi. Ushbu uchrashuvlarda aholining ichimlik suvi va kanalizatsiya xizmatlari bilan ta’minlanishi, davlat boshqaruv tizimini rivojlantirish, avtomobil yo‘llarini modernizatsiya qilish va qurish, shuningdek, O‘zbekistonda kichik aviatsiyani rivojlantirish masalalari muhokama qilinadi.