Strategik islohotlar agentligi huzuridagi Natijalarga erishishni boshqarish guruhi Deliver Unitda “Maʼlumotlarni boshqarishning milliy tizimi toʻgʻrisida”gi Qonun loyihasini ishlab chiqish masalasiga bag‘ishlangan ishchi guruhning dastlabki yigʻilishi boʻlib oʻtdi.
Qonun loyihasi muvaffaqiyatli xalqaro tajribalarga asoslangan, hujjatning amal qilish doirasi va asosiy texnik jihatlarini belgilab beruvchi konsepsiyaga muvofiq ishlab chiqilmoqda.
Muhokamalar chogʻida yangi tizim ma’lumotlaridan foydalanish jarayoni davlat organlari xodimlarining funksional vazifalaridan kelib chiqib tartibga solinishi belgilab o‘tildi.
Qonun loyihasi ma’lumotlarni birlashtirishni nazarda tutadi. Bunday chora-tadbirlar ma’lumotlar Vazirlik va idoralar tomonidan ishlatilishida hamda ishonchli dalillar asosida qarorlar qabul qilish imkoni taqdim etilib, qabul qilingan qarorlar va ularni amalga oshirish uchun ajratilgan mablag‘larni optimallashtirishga ko‘maklashadi. Shu bilan bir qatorda, yangi tizim davlat organlarida muvofiqlashtirish va umumiy boshqaruvni takomillashtirishga xizmat qiladi.
Ishning bir qismi sifatida tizimga bo‘lgan talablar aniqlanmoqda. Har bir vazirlikning asosiy funksiyalari va BMTning UNECE talablariga muvofiq ma’lumotlarni turkumlash ishlari olib borilmoqda.
Maʼlumot uchun: UNECE (Birlashgan Millatlar Tashkilotining Yevropa Iqtisodiy Komissiyasi) – Birlashgan Millatlar Tashkilotining Yevropa, Shimoliy Amerika va Markaziy Osiyo mamlakatlari oʻrtasida iqtisodiy hamkorlikni rivojlantirishga qaratilgan tashkiloti. Ma’lumotlarni turkumlashtirish kontekstida UNECE ma’lumotlar almashinuvi, statistika va tahlilni osonlashtiradigan standartlar va tasniflarni ishlab chiqishda muhim rol o‘ynaydi. Ushbu standartlar turli sohalar o‘rtasida ma’lumotlarning o‘zaro muvofiqligini yaxshilashga ko‘maklashadi.
Qonun loyihasi Statistika agentligi, Adliya vazirligi, Raqamli texnologiyalar vazirligi, Iqtisodiyot va moliya vazirligi, Kadastr agentligi, Soliq qo‘mitasi va Davlat bojxona qo‘mitasi bilan hamkorlikda ishlab chiqilmoqda.
