Strategik rivojlanish va islohotlar agentligi direktori Baxodir Raxmatov videoaloqa orqali britaniyalik tarixchi olima va teleboshlovchi Bettani Xyuz bilan muloqot o‘tkazdi.
Avval xabar berganimizdek, mazkur muallif jamoasi bilan hamkorlikda “UZBEKISTAN THE GOLDEN ROAD” (O‘zbekiston – oltin yo‘l) nomli hujjatli film tayyorlangan edi. Film shu yil 18 oktabr kuni praym-taym vaqtida Buyuk Britaniyaning “Channel 4” telekanalida namoyish etildi. U tomoshabinlar tomonidan katta qiziqish bilan qabul qilinib, The Times, The Daily Telegraph, iWeekend, Radio Times, TV Guide, What’s on TV, Wanderlust va TV & Satellite Week kabi nufuzli OAVlarda yoritildi.
Ayni paytda ushbu film Kinematografiya agentligi tomonidan o‘zbek va rus tillariga o‘girilib, dublyaj qilinmoqda. Uni davlat va nodavlat telekanallar orqali namoyish qilish rejalashtirilgan.
Bettani Xyuz bilan muloqotda ijodiy hamkorlikni davom ettirish, hujjatli filmning keyingi qismlarini suratga olish masalalari muhokama qilindi.
Jumladan, navbatdagi qismda Prezidentimiz Shavkat Mirziyoyev tashabbusi bilan barpo etilgan Toshkent City, Islom sivilizatsiyasi markazi, Amirsoy kurorti, “Yangi O‘zbekiston” bog‘i va Olimpiya shaharchasi, shuningdek, Zomin, Qo‘qon, Kitob, Sangardak va Mo‘ynoqdagi tabiat maskanlarini keng yoritish ko‘zda tutilmoqda.
Bu sa’y-harakatlar xalqimizning boy madaniy merosi va bugungi zamonaviy infratuzilmasini jahon jamoatchiligiga tanitish, umuman, mamlakatimizning ijobiy imiji va turizm brendlarini keng yoyishga xizmat qiladi.
