Strategik islohotlar agentligida Elektron to‘lovlar ulushini oshirish bo‘yicha kompleks chora-tadbirlar rejasi loyihasini ishlab chiqish doirasida Yandex kompaniyasining O‘zbekistondagi boshqaruvchisi Izzat Shukurov bilan uchrashuv bo‘lib o‘tdi.
Uchrashuv davomida asosan elektron hisob-kitoblarni rag‘batlantirish va mavjud to‘siqlarni bartaraf etish bo‘yicha takliflar muhokama qilindi. Xususan, naqdsiz to‘lovlar ulushining oshishi yashirin iqtisodiyot bilan bevosita bog‘liqligi ta’kidlandi. Shu bilan birga, marketpleyslar rivojlanishi elektron savdo hajmini oshirishga xizmat qilayotgani qayd etildi. Biroq, norasmiy yo‘l bilan olib kirilgan mahsulotlar ko‘pincha narx bo‘yicha marketpleyslardagi tovarlardan ustun kelayotgani sababli, bu holatni hal etish uchun bunday mahsulotlar importi ustidan nazoratni kuchaytirish yoki ularning onlayn platformalarda sotilishiga ruxsat berish taklifi bildirildi.
Shuningdek, elektron to‘lovlar ulushini hisoblashda bank kartalari orqali amalga oshirilayotgan barcha tranzaksiyalarni inobatga olish lozimligi, ularning katta qismi aynan tovar va xizmatlar uchun to‘lovlardan iborat ekani aytib o‘tildi.
Qo‘shimcha to‘siqlardan biri sifatida milliy to‘lov operatorlari tomonidan belgilangan vositachilik komissiyalari tartibi tilga olindi. Yandex rahbarining so‘zlariga ko‘ra, milliy to‘lov tizimlarining banklarga ajratayotgan mukofotlari xalqaro to‘lov tizimlariga nisbatan past bo‘lgani sababli banklar xalqaro to‘lov kartalarini chiqarishga ustuvorlik berayotgani kuzatilmoqda.
Bundan tashqari, qonunchilikni takomillashtirish, xususan, “To‘lovlar va to‘lov tizimlari to‘g‘risida”gi Qonunni qayta ko‘rib chiqish zarurligi alohida e’tirof etildi. Amaldagi qonunda ayrim tushuncha va atamalar eskirgan, ularning aniq ta’riflari, xususan tarif yondashuvlari mavjud emasligi elektron to‘lovlar infratuzilmasi rivojiga to‘sqinlik qilayotgani haqida so‘z bordi.
Shu sababli, ushbu Qonunga o‘zgartirishlar kiritib, mahalliy va xorijiy to‘lov operatorlari va to‘lov tashkilotlari tomonidan vositachilik komissiyalarni belgilash normalarini, transchegaraviy to‘lovlar bo‘yicha xizmat ko‘rsatish tartibini, moliyaviy xizmatlar bilan bog‘liq operatsiyalar to‘g‘risidagi axborotlar almashinuvi tartib-qoidalarini aniq belgilash taklif etildi.
Uchrashuv yakunida tomonlar davlat organlari va fintex bozori ishtirokchilari o‘rtasida ochiq muloqot olib borish muhimligini yana bir bor ta’kidladilar. Bildirilgan takliflar zamonaviy, ochiq va samarali Elektron to‘lovlar ulushini oshirish bo‘yicha kompleks chora-tadbirlar rejasi loyihasi doirasida batafsil ko‘rib chiqiladi.
