Bugun Toshkentda strategik rejalashtirish sohasida salohiyatni oshirish bo‘yicha seminar bo‘lib o‘tdi. Tadbir Strategik islohotlar agentligi, Qonunchilik va huquqiy siyosat instituti, Iqtisodiy hamkorlik va taraqqiyot tashkiloti (IHTT) hamda Germaniya xalqaro hamkorlik jamiyati (GIZ) hamkorligida tashkil etildi.
Seminarda Strategik islohotlar agentligi direktori Baxodir Raxmatov, Qonunchilik va huquqiy siyosat instituti direktori o‘rinbosari Vosidjon Ergashev, Adliya vaziri o‘rinbosari Alisher Karimov, GIZning O‘zbekistondagi direktori Yoaxim Frits, IHTT siyosiy tahlilchisi Saymon Kallevaert, shuningdek, xalqaro tashkilotlar va tarmoq vazirliklari vakillari ishtirok etdi.
Seminar IHTTning “Davlat boshqaruvi sharhi” loyihasining ikkinchi bosqichi doirasida bo‘lib o‘tdi. Ushbu bosqich 4 ta asosiy yo‘nalishlarni: strategik rejalashtirish va siyosatni muvofiqlashtirish, nomarkazlashtirish, ma’lumotlarga asoslangan siyosat ishlab chiqish, shuningdek, natijadorlikni boshqarish vositalarini qamrab oladi.
Tadbirda ta’kidlanishicha, 2017–2024 yillar davomida O‘zbekistonda 127 ta strategik hujjat, jumladan 39 ta strategiya va 87 ta konsepsiya qabul qilingan. Hozirda esa “Turizm–2040” strategiyasi hamda 2030-yilgacha energiya samaradorligini oshirish strategiyasi kabi 142 ta yangi hujjat ishlab chiqilmoqda.
Seminarda Strategik islohotlar agentligi tomonidan ishlab chiqilgan “Strategik rejalashtirish tizimini joriy etishga doir dastlabki chora-tadbirlar to‘g‘risida”gi O‘zbekiston Respublikasi Prezidenti Farmoni loyihasining taqdimoti o‘tkazildi. Hujjat strategiyalarni ishlab chiqish jarayonlarini tartibga solish, metodologik yondashuvlarni belgilash, sohada kadrlar tayyorlash va vazirliklarning tegishli tarkibiy bo‘linmalarining salohiyatini oshirishga qaratilgan.
IHTT ekspertlari Saymon Kallevaert va Elina Smetanina strategik rejalashtirish bo‘yicha tarmoq vazirliklariga metodik ko‘mak mexanizmlariga bag‘ishlangan taqdimot o‘tkazib, tajriba almashuv tizimini yaratish va metodologiyalarni ishlab chiqish zarurligini ta’kidladi.
Chexiya Hududiy rivojlanish vazirligi strategiyalar va shahar siyosati bo‘limi boshlig‘i Vera-Karin Brazova Chexiya tajribasiga doir taqdimot o‘tkazdi. Jumladan, “Strateduka” o‘quv dasturi doirasida 300 dan ortiq davlat xizmatchilari tayyorlangani, strategik hujjatlarni qonunchilik bilan bog‘lovchi vositalar, shuningdek Strategiyalar bazasi va Strategik ekspertlar guruhi faoliyati bo‘yicha ma’lumot berildi.
Portugaliyalik xalqaro ekspert va PlanAPP markazi sobiq direktori Paulo Areoza Feyo strategik rejalashtirishni institutsionallashtirishga oid innovatsion yondashuv – mutaxassislik markazlarini yaratish bo‘yicha taqdimot qilib, PlanAPP’ning strategik fikrlash, tahliliy vositalar va monitoringni yagona platformada birlashtirishini ta’kidlab o‘tdi.
Shuningdek ekspert mustaqil tahliliy bo‘limlarining o‘rni, strategiyalar ta’sirini baholash metodikalari va manfaatdor tomonlarni milliy ustuvor yo‘nalishlarga jalb etish mexanizmlari haqida so‘z yuritdi.
Seminarda ilgari surilgan tavsiyalar O‘zbekistonda strategik rejalashtirish tizimini rivojlantirish maqsadida puxta o‘rganilib, strategik rejalashtirish tizimini joriy etish bo‘yicha ishlab chiqilgan farmon loyihasiga kiritiladi.
